شاعر: ذاکر

 

عممه‌جان یقین اؤللــه‌م، چون منه عیان اوْلدۇ

گلمه‌دی علی اکبر (ع)، جان وئره‌ن زمان اوْلدۇ


---------------

دۇر چێراغێ بیر یاندێر، عممه‌جان سنی تاری

قوْی دۇرۇم آیاق اۆسته، بیر باخێم وطن ساری

بیر وصیتیم واردێر، ائیله گؤز یاشۇن جاری

اکبریم فراقیندا، باغرێم عممه قان اوْلدۇ

---------------

ائی اسیر-ی-آواره، تاپمادێم سنه چاره

گل قۇجاغیمه قوْیما، گۆل اۆزۆنی دیواره

یئددی قارداشێم اؤلمۆش، رحم ائله من-ی-زاره

باشیمه گلیب توفان، ائی رقیه جان لای لای

---------------

بۇ خرابه ده اؤللـه‌م، سوْلدۇ گۆل بۇداغیندا

قالدێ گؤزله‌ریم یوْلدا، اکبرین فراقیندا

گل چالێشگینان عممه، من یتیم سوْراغیندا

معجه‌رین کفه‌ن ائیله، چوْخ حالیم یامان اوْلدۇ

---------------

ائی یتیم-ی-بیچاره، زینبین نده‌ن اؤلمه‌ز

کثرت-ی-قناعه‌تده‌ن، گؤزله‌ریم بالا گؤرمه‌ز

بیر نفه‌ر غریب اوْلسا، کیمسه یانینا گلمه‌ز

من اوْلۇم سنه قۇربان، ائی رقیه جان لای لای

---------------

عممه جان یقینیمدیر، نعشیمه کفه‌ن اوْلماز

من بۇ حالیله اؤللـه‌م، زنجیریم آچان اوْلماز

گلمه‌دی علی اکبر، قبریمی قازان اوْلماز

جان گلیب دوْداغیمه، مؤهله‌تیم بیر آن اوْلدۇ

---------------

شام-وْ-کوفه‌نین اهلی، تؤکدی قانلێ گؤز یاشێم

چوْخ منی دانێشدێرما، اؤلدۆ یئددی قارداشێم

طاقه‌تیم گئدیب الده‌ن، گؤر قارالێ دیر باشێم

باشێما گلیب توفان، ائی رقیه جان لای لای

---------------

اۆزدیله‌ر الیم آللاه، ماه-ی-بی‌قرینه‌مده‌ن

حسره‌ت آیرێلیر جانیم، خێرداجا رقیه‌مده‌ن

حشر اوْلۇنجا بۇ نیسگیل، سوز-وْ-آه-ی-سینه‌مده‌ن

گئتمه‌ز ائی موسه‌لمانلار، ائی رقیه جان لای لای



تاريخ : چهارشنبه شانزدهم اسفند 1391 | 18:44 | نویسنده : خادم الرقیه |